Кои се првите симптоми на бременост?

Првите симптоми на рана бременост се различни кај секоја жена. Кај некои симптомите се поизразени, а други, пак, не чувствуваат никаква промена. Некои од симптомите не се специфични само за бременоста. За тоа како да се препознаат и на кои знаци треба да им се обрне внимание „Мама не си сама“ разговараше со доц. д-р Корнелија Трајкова, специјалист гинеколог акушер во клиничката болница „Аџибадем Систина“.

Прв и најчест симптом на бременост е изостанокот на менструално крвавење при редовен менструален циклус и сомнение за можна бременост. Најсигурен доказ е тестот за бременост, комерцијален или лабораториски, преку анализа на урина или на крв. Другите симптоми се несигурни и не се специфични само за бременоста. Може да се појават во различен период со различен интензитет, но може и целосно да изостанат. Многу од нив може да бидат симптоми и за некоја друга здравствена состојба, вели д-р Трајкова.

Кои промени настануваат во организмот на жената?

Гинекологот Корнелија Трајкова посочува дека со почетокот на бременоста настануваат физиолошки промени во организмот на жената, кои се одразуваат со различни, очекувани знаци, односно симптоми.

• Напнатост на дојките/градите, зголемена чувствителност и неудобност, која со текот на бременоста полека се намалува.
• Мачнини и гадење, кое може да биде придружено со повраќање. Вообичаено се појавува во текот на првиот месец. Најизразено е во периодот околу два месеци по изостанокот на менструацијата, а кај некои жени може да биде присутно и подолг временски период, со различен интензитет.
• Зачестено мокрење, уринирање, кое е нормална, очекувана појава која се должи на зголемениот волумен на крв во телото, што резултира со зголемено производство на урина. 
• Заморот е чест симптом. Не е јасна точната причина, но се смета дека е резултат на растот на прогестеронот во текот на првиот триместар.
• Промени во расположението, како и невообичаено поизразена чувствителност, емотивност и раздразливост.
• Подуеност, слично на чувството пред започнување на менструалното крвавење.
• Оскудно, точкесто крвавење или имплантациско крвавење, кое се појавува кај некои жени во периодот кога оплодената јајце-клетка се вгнездува во слузницата на матката, односно околу 10-14 дена по оплодувањето. Се јавува во периодот кога се очекува менструално крвавење.
• Слаби, повремени грчеви на матката може да се појават кај одреден процент од бремените жени во раната бременост, како резултат на приспособувањето на матката на новонастанатата состојба.
• Променет апетит со аверзија или со особена желба за одредена храна (аверзија спрема одредени мириси, кои може да бидат со различен интензитет).
• Затнат нос е чест симптом, кој е резултат на отечената носна слузница како резултат на зголеменото ниво на хормони во циркулацијата.  

Според гинекологот Корнелија Трајкова, клучно е, доколку комерцијалниот тест за бременост е позитивен, да се закаже гинеколошки преглед за потврдување на бременоста. Позитивниот тест е само доказ дека постои бременост, но ултразвучниот преглед е клучен за потврда на местото и на развојот на бременоста.