Дилема за секоја трудница - природно породување или царски рез?

Породувањето е можно на два начина: по природен пат или со царски рез. Статистичките податоци покажуваат дека една третина од бебињата денес се раѓаат со царски рез. Некои жени самостојно одлучуваат да се породат на ваков начин, а други, пак, со одлука на лекарите поради ризик за мајката или за бебето. Според доц. д-р Корнелија Трајкова, специјалист гинеколог акушер во клиничката болница „Аџибадем Систина“ вагиналното (природно) породување треба секогаш да биде прва опција онаму каде што нема никаква причина за породување со царски рез. Кај одреден процент од бремените жени царскиот рез е неопходен и одлична опција за успешен исход, односно за добивање здраво бебе и здрава мајка, вели за „Мама не си сама“ гинекологот Трајкова.

Гинекологот Корнелија Трајкова за „Мама не си сама“ подетално ги објаснува двата начина на породување, колку време траат, но и кои се разликите во процедурата, заздравувањето и во компликациите.

Природно породување 

При вагиналното породување мајката минува низ процесот на породување. Времетраењето на породувањето варира, но се состои од 4 фази, посочува д-р Трајкова.

• Регуларни контракции на матката, со прогресивно отворање на грлото на матката до 10 см.
• Раѓање на бебето, кога е неопходна соработка од мајката со туркање при чувство на напон. 
• Раѓање на постелката, вообичаено до 30-ина минути по раѓањето на плодот, по што следува преглед на родилните патишта и шиење на т.н. епизиотомија (засек кој се прави кај одреден процент за да се олесни процесот) или на расцепите кои може да настанат во текот на раѓањето.
• Период од два часа кога мајката останува под надзор во родилната сала.

Според гинекологот Трајкова, кај некои жени може да се понудат и да се дадат лекови за забрзување на процесот, т.н. активно водење на раѓањето, како и епидурална аналгезија со цел намалување на интензитетот на болките, но во ситуација кога за тоа има услови, односно медицински оправдана причина.

• Новороденчињата имаат корист од природното раѓање. Тие го минуваат родилниот канал и се стекнуваат со добри бактерии, што, според многу студии, резултира со подобар имунолошки систем и со помал ризик од алергии за бебето. По вагиналното породување мајките можат веднаш да започнат со доење, вели д-р Трајкова.

Според гинекологот Трајкова, кај некои жени може да се понудат и да се дадат лекови за забрзување на процесот, т.н. активно водење на раѓањето, како и епидурална аналгезија со цел намалување на интензитетот на болките, но во ситуација кога за тоа има услови, односно медицински оправдана причина.

Породување со царски рез

Гинекологот Трајкова посочува дека царскиот рез е оперативно завршување на раѓањето, односно раѓање на бебето по хируршки пат, преку отвор на долниот дел на стомакот на жената. Може да биде планиран, односно елективен или итен.

• Кај елективниот царски рез постои јасна причина од мајката или од плодот (на пример, плодот е попречно поставен, постелката е поставена на излезот на матката, односно го препокрива грлото на матката, болести на мајката кои се ризик за спонтано породување и сл.). Итниот царски рез спасува живот во ситуации кога мајката или бебето се во опасност, вели д-р Трајкова.

Таа објаснува дека царскиот рез се прави со анестезија, најчесто спинална, со цел блокада на долната половина од телото, кога жената е свесна, но не чувствува болка и има можност да го види бебето веднаш по раѓањето. Во ретки случаи е неопходна општа анестезија. Операцијата вообичаено трае околу еден час и има одреден процент на ризик, како и секоја хируршка процедура.

Според гинекологот Трајкова, вообичаено, закрепнувањето по царски рез е подолго во споредба со вагиналното раѓање. Процесот на породување е помалку болен (без контракции, без туркање), особено кај елективниот царски рез, но се чувствува поинтензивна болка по породувањето, што е спротивно на вагиналното породување, каде што болката е вообичаено поинтензивна при процесот на раѓање, а закрепнувањето по породувањето е многу побрзо и полесно. Сепак, современите лекови за олеснување на болката помагаат да се обезбеди добра контрола врз болката.

• Породувањето со царски рез не значи дека и следните породувања ќе бидат со царски рез. Тоа зависи од повеќе фактори, вклучувајќи ги причината за претходниот царски рез, временскиот период од претходниот царски рез до следната бременост и други медицински или хируршки состојби, потенцира д-р Трајкова и додава дека и царскиот рез и вагиналното породување имаат позитивни и негативни страни. Најважно е да се почитуваат медицинските индикации и да се избере најдобрата опција, со цел мајката и детето да се безбедни и здрави.