Дали таткото треба да е присутен на породувањето?

Породувањето е еден од најубавите и најемоционалните моменти во животот на еден пар. Присуството на таткото за време на овој процес  може да има огромно значење не само за него туку и за мајката и за бебето. За тоа зошто присуството на партнерот за време на породувањето е важно и како може тој да биде поддршка во овој посебен чин, „Мама не си сама“ побара стручно мислење од прим. д-р Марина Поп-Лазарова.

• Ова веќе не е табу-тема и сѐ почесто се соочуваме со можноста и со желбата и идниот татко да биде присутен на чинот на породувањето. Во нашата средина сѐ уште имаме различни ставови, но мораме да укажеме и на заклучоците од големиот број медицински релевантни студии кои се направени досега, а кои ја разрешуваат оваа дилема. Треба да потсетиме и дека чинот на породување е придружен со присутна болка кај жената, а секоја жена е посебна и единствена во тој процес. Некои жени се потолерантни и поиздржливи на болка и токму поради тоа искуствата од породувањето се различни и индивидуални. Болката во текот на породувањето е секогаш застапена, но индивидуалното чувство е секогаш различно и тоа зависи од многу социјални, психолошко-емотивни и физички фактори, кои меѓу себе се испреплетуваат, вели педијатарот д-р Поп-Лазарова од „РеМедика“.

Колку трае породувањето и колку фази има?

Доктор Поп-Лазарова потенцира дека должината на породувањето е различна. Очекувано е подолго да трае кај прворотки отколку кај повеќеротки, но во просек од 15 до 20 часа. Таа ги објаснува фазите и што се случува во текот на целиот процес.

Прва фаза на породувањето

Во првата фаза од породувањето болката е предизвикана од контракциите (стегањето) на матката, почетокот на отворањето на грлото на матката и од растегнувањето на нејзиниот долен дел. Оваа фаза е најдолга и, како што веќе споменавме, никогаш не може да се предвиди како ќе го толерира секоја жена овој период. Покрај методите за обезболување, кои имаат свое место во оваа фаза (епидуралната анестезија), особено е важна психолошката поддршка што родилката ја добива во овој период. Комфорното сместување, опкружувањето, амбиентот и присуството на нејзините најблиски (пред сѐ, партнерот) имаат силно влијание во позитивна смисла. Студиите покажуваат дека од тоа зависи и должината на оваа фаза од породувањето, која значително се скратува во тие околности, посочува педијатарот.

Втора фаза на породувањето

Во втората фаза од породувањето доаѓа до целосно ширење на грлото на матката, растегнување на вагиналниот прегиб и до постепено спуштање на бебето низ родилниот канал, период кога болката се интензивира и го менува својот карактер. За среќа, оваа фаза е многу пократка, но поинтензивна и завршува со раѓање на бебето очекувано повеќе месеци. Присуството на партнерот во оваа фаза е пожелно, но не е задолжително и обврзувачко. Претставува личен избор на парот и е навистина индивидуален, а е условен од многу фактори (предрасуди, можност за претходна подготовка за породување, лична психолошка подготвеност и компензирање на емотивното доживување), кои, секако, меѓу себе се условуваат, објаснува д-р Марина Поп-Лазарова.

Зошто треба татковците да присуствуваат на породувањето?

Од нашето досегашно искуство, морам да кажам дека помладите парови се поподготвени за оваа ситуација и ја доживуваат многу природно и позитивно. Имаме често случаи каде што имало двоумење, но со поддршка од медицинската екипа партнерот влегол во родилната сала и бил присутен на овој уникатен чин и доживување. Имено, тоа се и  зборовите со кои ги мотивираме да бидат присутни на ова ексклузивно  случување, кое има животно значење и смисла, а кое се случува толку ретко во животот, вели педијатарот и набројува дел од емоциите кои можат да се доживеат кога бебето ќе дојде на свет.

• Првиот плач и контактот со нивното заедничко дете навистина имаат посебна емотивна енергија и возбуда која ја чувствуваме сите ние кои професионално сме ангажирани и присутни на овој чин. Првите честитки, бакнежи и направени фотографии се незаменливи впечатоци, кои прават заедничкиот живот да биде емотивно побогат, а семејните односи посилни, порачува д-р Поп-Лазарова.

Порака за идните татковци

Доктор Марина Поп-Лазарова ги охрабрува идните татковци да размислуваат за свое присуство за време на породувањето и да бидат во поголем број присутни во родилните сали покрај своите сопруги за да им дадат поддршка, а истовремено и за да го споделат овој незаборавен, радосен момент во животот. Нашиот одговор на оваа дилема е ДА!