Драга мама, грижата за себе по породувањето е исклучително важна за здравјето на твоето бебе!

Како што мајката се грижи за новороденчето така треба да се грижи и за сопственото здравје. И покрај сите обврски во текот на денот, родилките мора да најдат време и за себе затоа што за здраво бебе потребна е здрава мајка. Ова го советува д-р Љубинка Дамјановиќ, специјалист психијатар во ЈЗУ Здравствен дом – Скопје.

За „Мама не си сама“ д-р Дамјановиќ посочува дека за жената мајчинството е искуство кое ја менува секојдневно; животен предизвик во кој сакаме да го заштитиме и да го чуваме своето бебе во безбедна средина за да расте здраво. Соочувајќи се со промените на телото под дејство на хормоните при бременоста, телото на идната мајка се менува, а по раѓањето секојдневните обврски околу новороденото дополнително влијаат да се почувствува истоштено, несигурно, а понекогаш и несреќно. 

• Позитивниот став спрема мајчинството, нежниот допир и секојдневната нега со нежни препарати за чувствителна кожа на новороденото ја стимулираат поврзаноста со мајката, а со тоа се стимулира и психичкиот развој на бебето. Доењето во текот на првите месеци понекогаш може да биде исцрпувачко, иако е активност која нуди контакт со очите, допир кожа на кожа, како и спокој и за мајката и за бебето. Менувањето пелени во раните утрински часови може да биде фрустрирачко за мајката која ја поминала ноќта будна. Но не е само грижата за новороденото на дневната листа на мајката. Тука се и грижата за сопругот, за домашното милениче, за другото детенце, кое веќе оди во градинка, за родителите, грижата за работните обврски... Сето ова може да биде многу стресна ситуација, а стресот негативно влијае врз расположението на мајката, што доведува до негативен ефект врз развојот на бебето, вели психијатарот Љубинка Дамјановиќ.

Родителството е проследено со стресни ситуации!

Доктор Дамјановиќ објаснува дека раното родителство не го следат секогаш само убави работи. Стресот предизвикан од загуба на член на семејството поради болест или поради несреќа, од загуба на работното место на партнерот, од елементарна непогода и слично негативно се одразува врз психичкото здравје на мајката во вид на анксиозност и на депресивност. Според психијатарот, овие состојби на мајката треба сериозно да се согледаат и да се побара соодветна помош и од семејството и од стручни лица. 

• Лекувањето на мајката е приоритет. Доколку има потреба, се прекинува и доењето, а помошта од другите членови треба да биде несебична и безрезервна за да се овозможи, во најскоро време, закрепнување на мајката и враќање на секојдневната грижа за бебето, вели д-р Дамјановиќ.

Мајката треба да се грижи и за себе!

Според психијатарот Дамјановиќ, како што мајката се грижи за своето новородено така треба да се грижи и за сопственото здравје и благосостојба. Во текот на денот мајката треба да најде време за себе, за прошетка, за здрав сон, за здрава исхрана, време за нега и за себеразгалување... Чувајќи и негувајќи си ги своето тело и својот ум, преку читање на омилената книга и преку слушање на омилената музика, мајката го јакне своето родителско искуство. Таа е позитивна и со нежност, љубов и со трпеливост се поветува на секојдневните потреби на своето новородено, посочува докторката.

• Нејзината енергија одекнува и се пренесува и на детето. Позитивниот став секогаш ќе го изроди од вас најдобриот родител на светот. Тајната на добриот родител не е жртвувањето на своите потреби поради детето, туку спротивното. Колку повеќе мајката се грижи за себе толку подобро ќе се чувствува и кога се грижи за своето бебе. Нејзиното родителство ќе биде попрефинето и подобро. Доброто родителство започнува со грижата за себе, порачува д-р Љубинка Дамјановиќ, специјалист психијатар.