Зошто некои деца имаат крв во урината?

Крв во урината кај децата, позната и како хематурија, е состојба која предизвикува загриженост, страв и паника кај родителите. Оваа појава може да биде видлива (макрохематурија) или да се открие само преку микроскопска анализа (микрохематурија).

За тоа што треба да знаете за оваа состојба, кои се причините и симптомите, како се открива и како се лекува „Мама не си сама“ побара одговори од детскиот нефролог доц. д-р Надица Ристоска-Бојковска од клиничката болница „Аџибадем систина“.

• Појавата на крв во детската урина е знак за аларм и паника кај родителите, особено ако детето има и болки во бубрезите и отоци по телото. Постојат повеќе причини за појава на крв во урината, но најважни се брзото откривање на причината и навременото лекување, за да се излекува болеста и за да не остави трајни последици и компликации врз детското здравје, посочува докторката и ги објаснува видовите хематурија (крв во урина). Ако урината е видливо црвена, станува збор за макрохематурија, а ако бојата не е променета, е микрохематурија и се утврдува само со микроскопска анализа на уринарниот седимент. Црвената боја на урината е од присуството на еритроцити во неа, кои може да потекнуваат од бубрегот, уретерите, уретрата или од мочниот меур. Макроскопската хематурија може да е поврзана со едеми (отоци), хипертензија (покачен притисок) и со ренална инсуфициенција (нарушена бубрежна функција).

Асимптоматска микроскопска хематурија е присутна кај 0,5 - 2% од децата на училишна возраст, потенцира д-р Ристоска-Бојковска, детски нефролог.

Црвената боја во урината може да е присутна и во други ситуации

Докторката објаснува дека урината може да има црвена боја не само при хематурија, туку и во следниве ситуации:

• при консумација на храна (цвекло, храна со прехранбени бои)
• лекови: Метилдопа, Фенацетин, Феназопиридин
• присуство на хемоглобин во урината.

Причини за хематурија во детската возраст

Според д-р Ристоска-Бојковска, повеќе причини можат да предизвикаат хематурија, односно појава на крв во урината:

• Голем број нефролошки заболувања – ломеруларни заболувања (ИгА-нефропатија, идиопатска (бенигна) хематурија, Алпортов синдром, акутен постстрептококов гломерулонефрит, мембранозна гломерулопатија, системски лупус еритематозус, хемолитично-уремичен синдром)
• Инфекција (бактериска, вирусна, туберкулоза)
• Нефролитијаза (камчиња во бубрезите и метаболна промена - хиперкалциурија)
• Хематолошки (тромбоцитопенија, коагулопатии)
• Анатомски абнормалности (вродени аномалии, траума, полицистични бубрези, тумори)
• Физичка активност (напор при спортски тренинзи)

Кои се симптомите?

Детскиот нефролог за „Мама не си сама“ посочува дека симптомите кои најчесто ги опишуваат децата се: печење при мокрење и често мокрење, како и тегоби на почетокот и при крајот на мокрењето.

• Многу е важно да се дознае колку време трае ваквата состојба, дали е придружена со каква било болка, особено силна бубрежна колика, и дали во семејството на детето има фамилијарна историја на гломеруларни болести. Честопати на појавата на крв во урината кај децата ѝ претходат респираторни инфекции предизвикани од бета-хемолитичен стрептокок од група А. Од голема важност при физичкиот преглед е воочувањето отоци по лицето и по телото. При сомнеж за акутен постстрептококов нефритичен синдром, потребни се хоспитализација и натамошен третман, вели д-р Ристоска-Бојковска.

Како се дијагностицира?

Доктор Надица Ристоска-Бојковска објаснува кои иследувања се потребни за да се дијагностицира хематурија (крв во урината).

• Сѐ започнува со лабораториски крвни анализи, анализа на урината, уринокултура и со ехо на уринарниот тракт. Во зависност од клиничката слика, треба да се направат и други иследувања, како што се ултрасонографскиот преглед, магнетната урографија, цистоскопијата и цистографијата. Во одредени случаи се прави и бубрежна биопсија, посочува детскиот нефролог.

Како се лекува хематуријата (крв во урина)? 

Начинот на лекување зависи од причината која довела до крв во урината, потенцира д-р Надица Ристоска-Бојковска и објаснува дека се потребни добра анамнеза, преглед и навремени иследувања, кои ќе помогнат да се открие причината и да се започне со терапија. Секое дете со перзистентна макроскопска хематурија треба да се хоспитализира за да се иследи и да се утврди точната причина за тоа.

• При акутна уринарна инфекција веднаш се започнува со лекување со уроантисептик или со антибиотик, како и со големо внесување течности, чаеви.

Ако станува збор за акутен постстрептококов гломерулонефрит, тој најчесто се јавува кај децата на училишна возраст кои прележале инфекција на грлото или на кожата со бета-хемолитичен стрептокок и се карактеризира со акутен нефритичен синдром: макроскопска хематурија, отоци (едеми), покачен притисок (хипертензија) и намалено мокрење (олигурија). Ако дијагнозата се постави навреме, веднаш се започнува со лекување. Прогнозата на заболувањето е добра: повеќе од 95 % од децата оздравуваат без напредување на болеста со хронични промени во бубрезите, објаснува детскиот нефролог.