Родителите на дете со забавен раст и развој се вистински херои!

Да се биде родител на дете со забавен раст и развој не е проклетство, туку предизвик. Овие родители се херои со големи срца полни со љубов и со разбирање, посветени се, организирани и се жртвуваат за детето, но и за семејството. Истите позитивни карактеристики ги имаат и братчињата и сестричките на детето. Вака психијатарот Љубинка Дамјановиќ ги опишува родителите и старателите на деца со забавен раст и развој. Таа во разговор за „Мама не си сама“ го споделува своето искуство и посочува кога треба да се побара помош од поширокото семејство или од стручни лица

Секојдневната пракса како психијатар и комуникацијата со семејствата во кои има дете со забавен раст и развој е секогаш различен предизвик. Живеењето во вакво семејство е поинтензивно како за родителите така и за братчињата и за сестричките. 

Овие родители будат восхит со својата посветеност, со темелната организираност за секојдневните активности и со себепожртвуваноста за доброто на детето, вели д-р Љубинка Дамјановиќ, специјалист психијатар во Заводот за ментално здравје „Младост“ при ЈЗУ Здравствен дом – Скопје.

И тие родители понекогаш се соочуваат со проблеми и им е потребна помош!

Психијатарот Дамјановиќ, според своето искуство, посочува дека понекогаш се забележува анксиозност кај родителот или кај старателот на дете со забавен раст и развој, а понекогаш и депресивност. За овие работи треба да се разговара и да се најде решение за тоа како да се растовари родителот, како да се искористат семејните потенцијали и капацитети во грижата за детето со задоцнет развој и, доколку е потребно, да се упати родителот на психолошко советување, па дури и на психијатриски третман доколку е потребно. 

• При соочување на родителот со сериозна болест, особено ако се работи за самохран родител, треба да се изнајдат решенија за згрижување на детето, дали во кругот на поширокото семејство или во институции, доколку нема друг соодветен член кој ќе понуди грижа, нега и стимулативна средина за развој, вели д-р Дамјановиќ.

Родителите треба да се грижат и за другите деца

Братчињата и сестричките на овие деца се со големо срце полно со љубов и имаат разбирање. Но да не заборавиме дека и тие се само деца, па да ги потсетиме родителите дека и со нив треба квалитетно да го поминуваат времето и да им бидат поддршка во текот на растот и развојот, советува психијатарот. 

• Вклучувањето и на другите членови на поширокото семејство е од голема полза за сите во семејството. Така се јакне семејната кохезија, а справувањето со секојдневните предизвици ги јакне силите на сите семејни членови. Би било убаво доколку би можело да има мобилни екипи од стручни лица кои своите услуги ги даваат во домот, за родителите да бидат растоварени од дополнителни ангажмани за водење по разни социјални, рехабилитациски и едукативни центри. Стручните служби треба да овозможат стручната помош секогаш да биде достапна и соодветна, посочува д-р Дамјановиќ.

Овие родители се херои и вистински професионалци!

Да се биде родител или згрижувач на дете со забавен раст и развој не е проклетство, туку предизвик да се осознаат сопствените сили за справување со работните, економските и со семејните задачи на најбрз и на наједноставен начин, потенцира психијатарот Дамјановиќ.

• И покрај секојдневните семејни предизвици во текот на растот и развојот на детето, овие родители се вистински професионалци на своите одговорни работни места како доктори, професори, наставници, инженери, пекари, новинари, цвеќари и слично. Не бараат никакво оправдување, туку сигурно и стабилно чекорат низ животот. Овие родители, едноставно, се ХЕРОИТЕ НА ДЕНОТ кои секојдневно со насмевка се борат со предизвикот и заслужуваат длабока почит и поддршка од сите нас, порачува д-р Дамјановиќ.