Совети од педијатар за одвикнување на детето од пелени

Одвикнувањето од пелени кај децата предизвикува страв од непознато и откажување од безбедноста која ја чувствувале претходно со пелените. Поради тоа детето не треба да се присилува да користи нокшир бидејќи тоа може да создаде контраефект и одбивност, потенцира педијатарот Манолева - Николовска.

• На почетокот најзначајно е на детето постепено да му се објасни удобноста кога не би носело пелени и леснотијата на носењето гаќички и на користењето нокшир. Родителите никогаш не треба насилно и многу упорно да инсистираат на одвикнување од пелени за детето да не се почувствува непријатно. Кај децата целосна контрола над мочниот меур и над цревата не се случува истовремено, што се смета за нормално и за очекувано. Целосната контрола над мочниот меур е многу потешка од целосната контрола над цревата и се стекнува многу подоцна. Затоа често се случува детето да изгуби контрола над мочниот меур и да уринира во гаќички во текот на процесот на одвикнување од пелени. Во такви ситуации родителите треба да останат смирени, да бидат полни со разбирање и да му објаснат на детето што е нормално и како да се потруди следниот пат да не се случи истото, објаснува за „Мама не си сама“ д-р Манолева - Николовска. 

Како да го навикнете детето на нокшир?

За да може детето целосно да го контролира мочниот меур, треба да се продолжи временскиот интервал од моментот кога детето ќе сфати дека треба да мочка до моментот кога ќе уринира, а тоа се случува со текот на времето и постепено. Потребно е време детето да се навикне на нокшир, за што родителите претходно преку зборување и преку ставање на детето на нокшир треба да го подготват за тоа што следува, вели педијатарот Манолева-Николовска и додава дека потоа треба да се создаде координација меѓу уринирањето, од една страна, како и информациите од мочниот меур кои одат до мозокот и потребата за уринирање, од друга страна.

• Исто така, со текот на времето детето треба да воспостави контрола врз мочниот меур додека се носи нокширот и додека се соблекуваат гаќичките, па сѐ до седнувањето на нокширот и уринирањето, кои се случуваат едно по друго и за краток временски период. На почетокот детето тешко го контролира мочниот меур додека се движи, па секое движење може да резултира со мокрење. Затоа е потребно детето да ја совлада техниката на одложување на потребата за уринирање, дури и кога се движи, додека го користи нокширот или додека се соблекува. Истото ова се случува и додека децата играат или додека вниманието целосно го фокусираат на одредена активност, кога најчесто знаат да не ја исконтролираат потребата за уринирање, по што се случува детето да се измочка во гаќички. Поради тоа процесот на одвикнување од пелени е долг процес. Сите чекори бараат долг тренинг и многу трпение од родителите, како и разбирање и поддршка која родителите треба да му ја покажат на детето во текот на целиот период на привикнување и на учење на новата рутина, посочува докторката за „Мама не си сама“.