Пневмококна вакцина Synflorix: педијатар објаснува како го штити детското здравје

Од 2019 година календарот за редовна имунизација на децата во Македонија е проширен со две нови задолжителни вакцини – пневмококната вакцина Synflorix и вакцината против ротавирус. За пневмококната конјугирана вакцина Synflorix, нејзината улога во заштитата на детското здравје, можните несакани реакции и за значењето на редовната имунизација, Мама не си сама разговараше со д-р Адријана Ставревска, специјалист по педијатрија.

Од што штити вакцината Synflorix?

Synflorix е пневмококна, конјугирана вакцина која се применува кај децата на возраст од 6 недели до 5 години. Нејзината цел е да обезбеди заштита од бактеријата Streptococcus pneumoniae, објаснува докторката и додава дека таа бактерија може да предизвика сериозни заболувања како на пример:

• менингитис,
• сепса,
• бактериемија (присуство на бактерии во крвотокот),
• пневмонија,
• инфекции на ушите.

Како дејствува вакцината?

По примањето на вакцината, организмот создава антитела кои се дел од имунолошкиот систем. Тие му помагаат на организмот да препознае и да се одбрани од бактеријата доколку дојде во контакт со неа.

Вакцината се аплицира интрамускулно, најчесто во бутот кај помалите деца или во надлактицата кај поголемите, посочува д-р Ставревска.

Можни несакани реакции

Како и сите лекови и вакцини и Synflorix може да предизвика несакани реакции. Најголемиот дел од нив се лесни, краткотрајни и поминуваат без последици, вели педијатарот Адријана Ставреска и ги објаснува сите реакции.

Многу чести несакани реакции

Се јавуваат кај повеќе од 1 од 10 вакцинирани деца и вклучуваат:

• болка, црвенило и оток на местото на апликацијата;
• телесна температура од 38 °C или повисока;
• треска;
• сонливост;
• намален апетит;
• раздразливост.

Чести несакани реакции

Се јавуваат најмногу кај 1 од 10 вакцинирани деца:

• стврднување на местото на инјектирање.

Невообичаени несакани реакции

Се јавуваат најмногу кај 1 од 100 вакцинирани деца:

• гадење,
• повраќање,
• дијареја,
• невообичаено плачење,
• чешање,
• осип,
• уртикарија,
• главоболка,
• оток на вакцинираниот екстремитет кој може да го зафати и соседниот зглоб,
• привремено запирање на дишењето (апнеја) кај предвремено родените доенчиња родени пред или во 28. гестациска недела.

Ретки несакани реакции

Се јавуваат најмногу кај 1 од 1.000 вакцинирани деца:

• грчеви без температура или поврзани со висока температура;
• алергиски реакции на кожата;
• колапс (ненадејна појава на мускулна млитавост);
• краткотрајно губење на свеста, недостиг на свест и бледило или промена на бојата на кожата со благо помодрување.

Многу ретки несакани реакции

Се јавуваат најмногу кај 1 од 10.000 вакцинирани деца:

• тешки алергиски реакции кои можат да доведат до колапс.

Доколку по вакцинацијата забележите каква било несакана реакција или сте загрижени за здравствената состојба на детето, обратете се кај вашиот педијатар, советува д-р Ставревска.

Зошто е важна редовната имунизација?

Редовните вакцини се меѓу најефикасните мерки за превенција на заразните болести кај децата. Пред нивното воведување во редовната програма за имунизација, тие поминуваат низ темелни испитувања за да се потврдат нивната безбедност, квалитетот и ефикасноста.

Со навремената вакцинација децата развиваат долготрајна заштита од сериозните заболувања и од нивните компликации, што придонесува за здрав раст, правилен развој и за подобар квалитет на живот, категорична е педијатарот Адријана Ставреска и го споделува календарот за имунизација во Македонија, односно кои вакцини на која возраст треба да се примат.