Совети од педијатар: што да направите за детето побргу да се приспособи во градинка?

Одлуката за запишување бебе до една година или дете по втората или по третата година од животот во градинка е голема промена за децата и за бебињата, но претставува голема промена и стрес и за родителите. Разделувањето од родителите и започнувањето во градинка секогаш е тешко за децата, особено за оние кои претходно не се разделувале од родителите на краток или на подолг временски период, посочува за „Мама не си сама“ педијатарот Елена Манолева - Николовска.

• Сите нови работи што ги воведуваме во животот на детето секогаш треба да ги правиме постепено и полека, па така и започнувањето во градинка, како една од поголемите промени во животот на децата, треба да се направи внимателно и постепено. На тој начин промената која настанува во животот на детето ќе биде помалку стресна и ќе биде полесно прифатена од детето. За таа цел, пред почетокот на започнувањето во градинка детето треба да го подготвиме за промената која следува, вели м-р д-р Елена Манолева - Николовска, специјалист педијатар.

Таа советува, без разлика дали се работи за дете од една година или за постаро дете, над две или три години, на почеток најзначајно е да се направи усогласување на навиките и на ритамот кои ги има детето во домот со навиките и со ритамот кои ќе ги има при престојот во градинка. Според неа, детето треба да се подготви за рано легнување навечер. Квалитетниот и долг сон ќе овозможи детето да биде одморено, да се разбуди рано и полесно да се одведе во градинка. Пред тргнувањето во градинка детето треба да има приближно ист ритам на спиење како тој во градинка, а истиот совет важи и за усогласувањето на ритамот на оброците во домот и на тие во градинка. На тој начин детето не би почувствувало поголема разлика во секојдневниот ритам и привикнувањето во градинка ќе биде полесно, посочува педијатарот Манолева - Николовска.

• Според докторката, корисно е во периодот пред запишување во градинка детето да се шета во близина на градинката и преку разговор да му се објаснува за играта со другарчињата, за забавата која ќе ја има со децата, како и за можностите да запознае нови другарчиња и да учи нови игри. Доколку постои можност, пожелно е детето да се запише во група во која веќе има познати другарчиња и врсници, бидејќи полесно ќе се вклопи со децата и полесно ќе прифати да поминува време со своите врсници секој ден, советува д-р Манолева - Николовска.
• Исто така, пред почетокот во градинка пожелно е детето да ги посетува бабата, тетката или своите најблиски роднини. Покрај посетите, пожелно е детето да се остава одреден временски период од неколку часа без родителите, со што полесно би се навикнало на разделбата со нив, вели докторката. 

Без разлика на стресот и на стравот кои ги чувствуваат родителите во себе и сите прашања што ги мачат во врска со почетокот на детето во градинка, не треба тие да се пренесат врз децата. Како родители не треба да го преувеличуваме тргнувањето во градинка и треба да се однесуваме спрема тоа како нормална работа во животот на нашите деца, посочува д-р Манолева-Николовска.

Таа додава дека, исто така, во овој период на промена не е пожелно да се прават истовремено и други промени во животот на детето, како на пример одвикнување од пелени, од доење или од цуцли. Според неа, важно е градинката никогаш да не се споменува како казна ако детето згреши, во смисла дека ќе биде одведено и оставено во градинка.

Колку време треба да трае периодот на адаптација?

Периодот на адаптација може да трае различно и е индивидуален за секое дете. Може да трае од неколку денови до два месеца. Најголем број од децата по два месеца се привикнуваат на учителките, на децата и на околината, се навикнуваат на ритамот на спиење и на јадење во градинка, како и на сите активности што се случуваат во текот на престојот во градинка. Дури и децата кои плачат и по неколку месеци кога одат во градинка по заминувањето и испраќањето на родителите, продолжуваат без проблем да престојуваат во градинка, смета педијатарот Елена Манолева-Николовска.

• Децата кои упорно плачат и одбиваат да останат во градинка најчесто го прават тоа поради чувство на страв. Најзначајно е во такви случаи да му се даде поддршка на детето преку разговор, да се утеши и да му се покаже дека неговиот страв е разбран и неоправдан. Доколку и потоа детето е вознемирено и уплашено, може да се направи кратка пауза, да се почека детето емотивно да созрее и по одредено време повторно да се проба да се запише во градинка. Порано или подоцна секое дете се навикнува на градинката со свое темпо, по што следува период кога детето покажува голема љубов спрема градинката и спрема другарите, посочува докторката.