Колку вирусни инфекции во текот на годината е нормално да прележат децата?

Секое дете на предучилишна возраст додека расте и по неколкупати се соочува со инфекција предизвикана од некои вируси, бактерии или други микроорганизми. Голем дел од децата инфекциите ги поминуваат лесно, но кај некои тие можат да предизвикаат и посериозни компликации и децата да завршат во болница.

За „Мама не си сама“ педијатарот Елена Манолева-Николовска објаснува дека инфективните заболувања се најчестите заболувања кај децата и дека се причина за најголемиот број посети на амбулантите и на болниците. Причинители на овие заболувања може да се вирусите, бактериите, габите, протозоите и паразитите. Од сите причинители најчести се вирусните инфекции, кои предизвикуваат 80-90 % од инфекциите во детската возраст. По нив според зачестеноста најбројни се бактериските инфекции, а многу поретки се инфекциите со другите видови микроорганизми.

• Најчести вирусни заболувања во детската возраст се оние кои предизвикуваат воспаление на респираторниот систем. Во периодот до петтата година од животот децата годишно во просек прележуваат од шест до девет акутни респираторни инфекции, а некои деца, особено оние на возраст до две години, може да преболат 10 до 12 инфекции во текот на една година. Децата кои посетуваат градинка и кои се на возраст до три години може да прележат и до 15 инфекции во текот на една година. Доколку инфекциите поминуваат релативно лесно и без престој во болница или без поголеми компликации, како што се на пример честите и рецидивантните пневмонии, бронхиолитисот или бронхитисот и воспалението на ушите, се смета дека се нормална појава за таа возраст. Најчести вируси кои предизвикуваат воспаленија на горните или на долните дишни патишта се респираторниот синцициелен вирус (RSV), риновирусот, аденовирусот, инфлуенцата и други, вели м-р д-р Елена Манолева - Николовска, специјалист педијатар.

Најчести симптоми на респираторните вирусни инфекции кај децата се течењето на носот, болката во грлото, кашлањето, кивањето, покачената телесна температура, малаксаноста, намалениот апетит, црвените и солзни очи, осипот на кожата...

• Респираторните вирусни инфекции, според своите симптоми и според клиничката слика, може да се манифестираат како ринитис, тонзилитис, синузитис, ларингитис, ларинготрахеитис, бронхиолитис, бронхитис и пневмонија. Многу често овие инфекции се манифестираат и со појава на конјуктивитис предизвикан од истите вируси кои може да предизвикаат инфекции и на респираторниот систем, потенцира педијатарот Манолева-Николовска.