Зошто треба да го масирате вашето бебе?

Масажата на бебињата дава голем број физиолошки, развојни и емоционални придобивки, како што се намалување на стресот, подобрување на циркулацијата, зајакнување на имунитетот; придонесува и за развој на мозокот, а се подобруваат и моторните вештини и спиењето. Исто така, врз бебето има релаксирачки и смирувачки ефект – тоа чувствува приврзаност со родителите, а, пред сѐ, сигурност.  За „Мама не си сама“ придобивките подетално ги објаснува м-р Дијана Мариновска, физиотерапевт во клиничката болница „Аџибадем систина“.

• Генерално, масажата ја забрзува циркулацијата на кртвта низ телото, со што се забрзуваат сите процеси на примање хранливи материи и на исфрлање на отпадните материи од процесите кои се случуваат во телото. По масажата видливо е благо зацрвенување на кожата, а тоа значи дека веќе со масажата сме добиле и нови крвни садови, односно дека мрежата на крвотокот е проширена, па хранливите материи стигнуваат полесно и до повеќе мускули и нерви. Со позабрзаното пристигнување на хранливите материи до мускулите и до нервите и со подобреното исфрлање на отпадните материи, благодарение на нивната функција, се подобрува работата (стегнувањето и релаксирањето) на мускулите, а пренесувањето на нервните дразби станува поцелосно, односно имаме дразби кои се пренесуваат побргу или, пак, работата се регулира според потребите. Со тоа добиваме едно правилно и контролирано движење и однесување и реакции кои се брзи и соодветни во итни ситуации, посочува физиотерапевтот.

Кога го масирате, треба да му зборувате на бебето

Според физиотерапевтот Мариновска, кај бебињата допирот преку масажа прави сензомоторна стимулација, па бебињата ја учат сликата за своето тело преку дразнење на нервните завршоци на кожата.

• Затоа кога го масираме секој дел од телото на бебето, пожелно е да му зборуваме, да му кажуваме како се вика секој дел што го допираме и што правиме. На пример: „Го масираме ноџето, коленцето, стапалото, прстињата“. Така ќе го поттикнеме неговиот когнитивен развој, па бебето ќе почне да учи и да се осознава себеси. Дури и кога е вознемирено бебето, масажата преку цврст, но нежен и постојан допир влијае преку автономниот нервен систем и ги смирува дишењето и срцебиењето. Ако на тоа го додадеме и зборувањето (мирно и сигурно), родителот го смирува бебето, но и се поврзува со него на посебен начин за нив двајца. Така се намалуваат хормоните на стрес, а се зголемуваат убавото искуство и убавото пријатно време поминато со родителот, советува м-р Дијана Мариновска.

Масажата го развива мозочето на бебето

Физиотерапевтот Мариновска за „Мама не си сама“ објаснува дека со масажата се подобрува и исхраната на мускулите преку крвотокот, а нивната подобрена контракција и релаксација го охрабрува бебето да се движи и да се чувствува убаво, но и да учи нови работи со самодоверба, затоа што од масажата движењата стануваат полесни за извршување и со поголем обем во зглобовите. 

• Кога бебето ги прави движењата лесно и со сигурност во себе, тоа го развива мозочето, многу полесно учи, а учи и да се движи, да реагира и да размислува на правилен начин. Целиот развој на бебето во првата година, кога и е најинтензивен, се одвива преку движењата, па затоа едно бебе кое не се движи ќе има застој и во менталниот развој, потенцира физиотерапевтот.

Кога да го масирате бебето?

Бебињата спијат често, особено во првите месеци, па родителите често се чудат кога би имало време за масажа, но во еден активен период од денот, кога бебето не спие, тие ќе ги искусат сите придобиви од масажата. Со помош на движењето и учењето тоа веќе е изморено, па затоа повеќе ќе јаде и подобро ќе спие, советува физиотерапевтот.

• Секое бебе треба да се гушка и да се гали, но еднаш во денот овој циклус од убави и пријатни потреби за бебето треба да биде заменет со придобивки. По бањање или менување пелена, масажа во времетраење од 15 до 30 минути ќе направи голема разлика во однос на имунитетот, растот и развојот на бебето, категорична е Мариновска.

Консултирајте се со стручно лице

Физиотерапевтот ги советува родителите пред да почнат со масажа на бебето да се консултираат со стручно лице.

• Посебни техники и зафати можат да помогнат кај бебињата кои имаат некакви отстапки во развојот или во тонусот на мускулите и во работата на нервите. Секогаш дозирано и под водство на стручни лица, масажата е добредојдена уште од првиот ден дома. Таа овозможува подобар сон, бебе кое самостојно и самоуверено се движи и се охрабрува да учи, подобар имунитет, подобар физички раст и развој, смирено бебе, подобро варење на храната, бебе со добар психолошки и емоционален развој, намалување на коликите и одржување на кожата. Ова се само дел од придобивките на масажата, кои во секојдневниот живот значат здраво и среќно бебе, смета Мариновска.