Која е причината за предвременото породување?

Во повеќето случаи не постои јасна причина зошто детето е родено предвреме, вели д-р Палчевска-Коцевска и додава дека шансите мајката да се породи предвреме се поголеми ако:

• претходно имала предвремено породување;
• имала еден или повеќе спонтани абортуси;
• има други здравствени проблеми како на пример прееклампсија и срцеви или бубрежни заболувања;
• има инфекција која не се лекува (како што е инфекцијата на уринарниот тракт);
• носи близнаци или тројка;
• забременила со помош на асистирано оплодување (ИВФ);
• пуши и консумира алкохол или наркотици;
• нема соодветна пренатална грижа.

Какви компликации може да се појават кај предвремено родените бебиња?

Предвремено родените деца можат да развијат различни компликации поради нецелосниот развој на сите органи. Колку порано се раѓаат толку е поголема веројатноста за појава на компликации, вели д-р Снежана Палчевска-Коцевска, педијатар неонатолог во клиничката болница „Аџибадем систина“ и ги набројува почестите компликации кај предвремено родените деца:

• невролошки компликации: отежнато дишење, отежнато цицање и голтање, крвавење во мозокот;
• компликации на дигестивниот систем: прекумерна плунка (неможност за голтање), цревно крвавење, жолта кожа (жолтица);
• компликации на имунолошкиот систем: инфекции;
• компликации на белите дробови: бели дробови исполнети со течност (респираторен дистрес-синдром);
• компликации на очите: крвавење и лузни на мрежницата (делот од окото потребен за видот), проблем наречен ретинопатија кај предвремено родените.

Компликациите може да се надминат по некое време. Но, сепак, предвремено родено бебе кое имало потешки компликации може да развие долготрајни проблеми со дишењето, видот и со психомоторниот развој, посочува педијатарот.

Како ги третираат лекарите предвремено родените бебиња?

Грижата за децата кои се родени предвреме се врши во посебни одделенија во рамките на здравствените установи, наречени неонатална интензивна нега. Најчесто, предвремено роденото бебе се става во инкубатор за да се обезбеди нормална телесна температура, објаснува неонатологот.

• Третманот на предвремено родените бебиња вклучува третман на компликациите кои се резултат на недоволно развиените органи. Сите специфични нарушувања се третираат по потреба. На пример, на предвремено родените бебиња може да им бидат потребни процедури и третмани за помош при проблеми со дишењето (како на пример механичка вентилација и администрација на сурфактант), кофеин за да не заборават да дишат, антибиотици за инфекции, трансфузија на крв за анемија и ласерска операција за очни болести или можеби ќе им требаат посебни дијагностички методи на сликање, како на пример ехокардиографија за срцеви заболувања. Честата појава на жолтица се третира со ставање на децата под посебни УВ-светла. Предвремено родените бебиња често се хранат интравенозно и/или преку сонди сѐ додека не станат способни за цицање и за голтање, вели д-р Палчевска - Коцевска.

Како може да се спречи предвременото породување?

Неонатологот Палчевска-Коцевска за Мама не си сама споделува неколку совети како можете да ја намалите веројатноста за предвремено раѓање:

• ако редовно одите на пренатални прегледи;
• ако јадете здраво;
• ако не консумирате алкохол;
• ако не уживате во тутун или во дрога;
• ако практицирате престој во природа и умерена физичка активност.

Што ако се појават симптоми за предвремено раѓање и какви се прогнозите?

Ако се појават симптоми за предвремено раѓање, лекарите може да препишат лекови со кои ќе се обидат да го забават или да го запрат предвременото раѓање, а притоа и да го подготват плодот подобро да стартува во новата средина. Тоа се таканаречени кортикостероиди, кои им помагаат на белите дробови на бебето да се развиваат побргу. Затоа овој третман се нарекува зреење, објаснува д-р Палчевска-Коцевска.

• Во текот на изминатите децении преживувањето и исходот од предвремените породувања драстично се подобрија, но проблемите како што се доцнењето во развојот, церебралната парализа, оштетувањата на видот и слухот, хиперактивноста со недостиг на внимание (АДХД) и проблемите со учењето сè уште се почести кај недоносените доенчиња отколку кај доносените новороденчиња. Најважните прогностички фактори се: тежината при раѓањето, степенот на недоносеност, дали мајката примала кортикостероиди 24 до 48 часа пред предвременото породување и можните компликации кои се јавуваат по раѓањето. Полот на детето, исто така, влијае врз веројатноста за добар исход: девојчињата имаат подобра прогноза од момчињата со ист степен на недоносеност, вели неонатологот и потенцира дека, сепак, со правилен третман, поголемиот дел од доенчињата родени по 28. недела од бременоста преживуваат со нормална невролошка функција.