Родителите на дете со забавен раст и развој се вистински херои!
Не бараат никакво оправдување, туку сигурно и стабилно чекорат низ животот.
Не само бебето, туку придобивки од доењето има и мајката. Тоа е процес кој е од исклучителна важност како за развојот на новороденчето така и за родилката, пред сѐ за нејзиното ментално здравје. Голем број истражувања укажуваат на редукција, односно на намалување на напнатоста, стресот и на депресивноста кај мајките кои успешно поминале низ процесот на доење, за разлика од мајките кои од различни причини го прекинале тој процес. За „Мама не си сама“ психијатарот Славица Арсова објаснува дека при процесот на доење се овозможува побрзо поврзување со бебето, а и контактот лице в лице или очи в очи, како и контактот со допир е посилен кај мајките кои дојат.
Преку доењето се разбираат потребите на бебето!
Доењето овозможува побрзо разбирање на потребите на бебето преку таа невербална комуникација, вели професорката Арсова, која е и раководител на Кабинетот за третман на жени во бременост и по породување на Универзитетската клиника за психијатрија.
- Се смета дека процесот на доење го намалува ризикот од развој на депресивност во постнаталниот период преку повеќе елементи. Имено, овозможува побрзо и поквалитетно поврзување со бебето, полесна невербална комуникација со него, следење на неговите потреби, редукција на стравот врзан околу правилната нега, чувство на задоволство од својата улога како мајка и задоволно и среќно бебе. При процесот на доење се зголемува и излачувањето на т.н. хормони на среќа (серотонин, допамин, окситоцин), кои, пак, од своја страна, го подобруваат расположението, ги намалуваат напнатоста и вознемиреноста, го регулираат сонот и ја поттикнуваат волјата. Сето ова е како магичен позитивен синџир. Доењето овозможува поврзување со бебето. Тоа се врзува за мајката, нахрането е, задоволно, сигурно и спокојно, а мајката се чувствува посигурно во својата улога, ѝ растат самодовербата и расположението и има време за одмор и за себе, вели проф. д-р Славица Арсова, психијатар на Клиниката за психијатрија.
На мајката ѝ се потребни помош и поддршка од најблиските
Според професорката Арсова, самиот процес на доење поттикнува лачење на уште повеќе млеко низ млечните жлезди и создавање уреден ритам во текот на грижата за бебето во првата година.
- Во текот на целиот овој процес кај некои мајки сѐ се одвива полесно и побргу, но кај некои има одредени тешкотии во однос на започнувањето и на одржувањето на доењето. Токму во однос на тоа од неизмерна важност се помошта и поддршката од семејните членови (родители, партнер) или од стручните лица, како на пример патронажни сестри или други кои се обучени во таа област и кои можат да ѝ помогнат на мајката во совладувањето на оваа вештина. Мајките кои ги доеле своите бебиња овозможуват и редукција на ризикот од нарушување на емоционалниот и на когнитивниот развој на бебето. Истражувањата велат дека доенчињата чии мајки ги доеле или комбинирале со исхрана преку шише биле со појасни и со побрзи одговори на дразбите од околината, па и со побрз и со подобар емоционален и когнитивен развој, вели психијатарот.
Што се случува доколку мајката во текот на бременоста или подоцна развие некоја анксиозна или депресивна состојба?
Поттикнувањето на процесот на доење има исцелувачко дејство дури и кај мајките кои биле со развој на анксиозност или на депресивност во текот на бременоста.
- Доколку мајката развива анксиозно-депресивна симптоматологија по породувањето, можно е таа да е од поблаг карактер, па со примена на нефармаколошки пристап, барање помош од стручни лица или, пак, со соодветен фармаколошки третман тоа може да се надмине. Помошта за мајките може да биде преку консултации со матичниот лекар или со матичниот гинеколог или да биде упатена на совет и на консултации кај психијатар или кај психолог, со цел надминување на оваа состојба и поттикнување и воспоставување уредно доење, поврзување со бебето и подобрување на менталната состојба на мајката. Информациите за ваквите тешкотии се добиваат од стручни лица преку директна или преку електронска или пишана комуникација, посочува психијатарот Арсова.
Таа потенцира дека депресивноста на мајката во текот на бременоста е сериозен ризик-фактор за развој на депресивност по породувањето и во текот на првата постанатална година.
